தேசிய ரீதியில் முக்கியத்துவம் பெற்ற உள்ளூராட்சி மன்றத்தேர்தல்
Rakshana MA
இலங்கையிலுள்ள வாக்களிக்க தகுதியான மக்கள் இன்று(06) 339 உள்ளூராட்சி மன்றங்களுக்கு உறுப்பினர்களைத் தேர்ந்தெடுக்க வாக்களிக்கச் செல்கிறார்கள்.
அதன்படி, வாக்களிப்பு காலை 7 மணிக்கு ஆரம்பமாகி மாலை 4 மணிக்கு முடிவடையும் என தெரிவிக்கப்பட்டிருந்தது.
இது 2018 ஆம் ஆண்டுக்குப் பின்னர் முதல் முறையாக நடைபெறும் தேர்தலாகும்.
முக்கியத்துவம் வாய்ந்த தேர்தல்
உள்ளூர் நிர்வாகங்களுக்கான உறுப்பினர்களைத் தேர்ந்தெடுப்பதற்காகவே இந்தத் தேர்தல் நடத்தப்பட்டாலும், தேசிய மக்கள் சக்தி, இலங்கை அரசியலை பொறுப்பேற்ற பின்னர் நடைபெறும் முதல் தேர்தல் என்பதால் இது தேசிய முக்கியத்துவம் வாய்ந்ததாக மாறியுள்ளது.
நகராட்சி மன்றங்கள், நகர சபைகள் மற்றும் பிரதேச சபைகள் ஆகிய 339 உள்ளூர் அதிகார சபைகளை உள்ளடக்கிய 4,877 தேர்தல் வட்டாரங்களுக்காக, 13,759 வாக்குப்பதிவு மையங்களில் இன்று வாக்குப்பதிவு நடைபெறுகிறது.
கடந்த ஆண்டு செப்டம்பர் மாத இறுதியில் ஆரம்பித்து, கடந்த ஆறு மாதங்களில் கொள்கை சீர்திருத்தங்கள், ஊழல் மற்றும் மோசடி ஒழிப்பு மற்றும் பொருளாதார மேம்பாடு ஆகியவற்றின் அடிப்படையில் அரசாங்கத்தின் செயல்திறனுக்கான ஒரு சோதனைக களமாக இன்றைய வாக்கெடுப்பு அமையும்.
2018 ஆம் ஆண்டு உள்ளூராட்சித் தேர்தலில், அப்போது எதிர்க்கட்சியில் இருந்த ஸ்ரீலங்கா பொதுஜன பெரமுன, ஆளும் ஐக்கிய தேசியக் கட்சியை தோற்கடித்தது.
கடந்த பொதுத் தேர்தலில், தேசிய மக்கள் கட்சி 6.8 மில்லியனுக்கும் அதிகமான வாக்குகளைப் பெற்றது. எனினும், இலங்கையின் தேர்தல் கலாசாரத்தின்படி, உள்ளூர் தேர்தல்களில் வாக்காளர் வாக்குப்பதிவு தேசிய தேர்தல்களுடன் ஒப்பிடும்போது ஒப்பீட்டளவில் குறைவாக இருந்து வருகிறது.
எனவே, இன்றைய தேர்தலில் பதிவாகும் மொத்த வாக்குகளின் எண்ணிக்கையில் சரிவு இயல்பாகவே எதிர்பார்க்கப்படுகிறது. இதற்கமைய, இந்தத் தேர்தலின் முடிவுகளை தேசிய ரீதியில் ஒப்பிட்டுப் பார்க்கமுடியும்.
ஆதிக்கம் செலுத்தும் அரசியல்
கடந்த இரண்டு தேசிய தேர்தல்களில் ஏற்பட்ட தோல்வியால், பிரதான எதிர்க்கட்சியான ஐக்கிய மக்கள் சக்தி, இந்த தேர்தலில் சிறப்பாக செயல்பட வேண்டிய கடுமையான அழுத்தத்தில் உள்ளது.
இல்லையெனில் அதன் பலவீனமான தலைமைக்கு கடினமான விடயமாகவே இந்த தேர்தல் அமையும். நாடாளுமன்ற உறுப்பினர் நாமல் ராஜபக்சவின் தலைமையில் பொதுஜன பெரமுன நாடு முழுவதும் பிரசாரம் செய்தது.
ஒரு காலத்தில் நாட்டில் ஆதிக்கம் செலுத்தும் அரசியல் சக்தியாக இருந்த அந்தக்கட்சி, கடந்த தேர்தல்களில் தோற்கடிக்கப்பட்டது.
இந்தநிலையில் நாமல் ராஜபக்ச, இப்போது குடும்பத்தின் கடந்தகால அரசியல் மகிமையை மீட்டெடுக்கும் சவாலை எதிர்கொள்கிறார். ஐக்கிய தேசியக் கட்சி மற்றும் சர்வஜன பலய ஆகியவை களத்தில் உள்ள ஏனைய இரண்டு கட்சிகளாகும்.
அத்தோடு, தேர்தல்களுக்குப் பிறகு, தொங்கு சூழ்நிலைகளில் தேசிய மக்கள் சக்தியை முறியடிக்க எதிர்க்கட்சிகள் ஒன்றிணைவதற்கான வாய்ப்புகள் உள்ளன.
இதேவேளை வடக்கு, கிழக்கு மலையகம் என்ற் அடிப்படையில் தமிழ் மற்றும் முஸ்லிம் கட்சிகளுக்கும் அநுரகுமார திசாநாயக்கவின் தேசிய மக்கள் சக்தியின் அலை பாதிப்பை எந்தளவுக்கு ஏற்படுத்துகிறது என்பதை இந்த தேர்தலின் மூலம் அறிந்துக்கொள்ளமுடியும்.
| நாட்டு நடப்புகளை உங்கள் கைபேசியில் பெற்றுக்கொள்ள முதன்மை WHATSAPP குழுவில் இணையுங்கள் JOIN NOW |
