மின்சார கட்டண திருத்தம் குறித்து மாகாண மட்ட கருத்துக்கள்!
Rakshana MA
மின்சாரக் கட்டணத் திருத்தம் தொடர்பில் மாகாண மட்டத்தில் பொதுமக்களின் கருத்தைப் பெறுவதற்கு பொதுப் பயன்பாடுகள் ஆணைக்குழு தீர்மானித்துள்ளது.
அதன்படி, எதிர்வரும் 27ஆம் திகதி முதல் அந்த கருத்துகள் பெறப்பட உள்ளதாக தெரிவிக்கப்பட்டுள்ளது.
மேலும், மின் கட்டணத்தை குறைக்க முடியாது என மின்சார வாரியம் முன்வைத்த யோசனைக்கு, பயன்பாட்டு ஆணைக்குழு பதில் அளித்துள்ளது.
வாய்மொழி ஆலோசனைகள்
தற்போதைய சூழ்நிலையில் 10 முதல் 20 சதவீதம் வரை மின் கட்டணத்தை குறைக்க வாய்ப்பு உள்ளதாக பொது பயன்பாட்டு ஆணைக்குழு தெரிவித்துள்ளது.
அதன்படி, எதிர்வரும் 17ஆம் திகதி முதல் இது குறித்து எழுத்துப்பூர்வமாக கருத்துக்களை தெரிவிக்க பொதுமக்களுக்கு அவகாசம் அளிக்கப்பட்டது.
எவ்வாறாயினும், எதிர்வரும் 27ஆம் திகதி முதல் இது தொடர்பில் மாகாண மட்டத்தில் உள்ள மின்சார பாவனையாளர்களிடமிருந்து வாய்மொழியாக ஆலோசனைகளை பெற்றுக்கொள்ள பொதுப் பயன்பாடுகள் ஆணைக்குழு தீர்மானித்துள்ளது.
இதன்படி எதிர்வரும் 27ஆம் திகதி மத்திய மாகாணத்தை பிரதிநிதித்துவப்படுத்தும் கண்டி மாவட்ட செயலகத்திலும், 31ஆம் திகதி ஊவா மாகாணத்தை பிரதிநிதித்துவப்படுத்தும் மொனராகலை மாவட்ட செயலகத்திலும் பொதுமக்களின் கருத்துக்கள் பெற்றுக்கொள்ளப்படும்.
ஜனவரி 4 ஆம் திகதி குருநாகல் மாகாண சபை அலுவலகத்தில் வடமேற்கு மாகாண மக்களுக்கும், ஜனவரி 5 ஆம் திகதி அநுராதபுரம் மாவட்டச் செயலகத்தில் வடமத்திய மாகாண மக்களுக்கும் பொதுக் கருத்துக்களை வழங்குவதற்கான சந்தர்ப்பம் வழங்கப்படவுள்ளது.
அத்துடன் சப்ரகமுவ மாகாணத்தைப் பிரதிநிதித்துவப்படுத்தி, ஜனவரி 3ஆம் திகதி இரத்தினபுரி மாவட்டச் செயலகத்திலும், ஜனவரி 4ஆம் திகதி தென் மாகாணத்தைப் பிரதிநிதித்துவப்படுத்தும் மாத்தறை மாவட்டச் செயலகத்திலும் பொதுமக்களின் கருத்துக்கள் பெற்றுக்கொள்ளப்படும்.
மேலும், வடமத்திய மாகாண மக்கள் ஜனவரி 5ஆம் திகதி அனுராதபுரம் மாவட்ட செயலகத்தில் பொதுக் கருத்துக்களையும், ஜனவரி 6ஆம் திகதி யாழ்ப்பாண மாவட்டச் செயலகத்தில் வடமாகாண மக்களுக்கும் பொதுக் கருத்துக்களை வழங்குவதற்கான சந்தர்ப்பம் வழங்கப்படவுள்ளது.
மாகாணமட்ட மக்களின் கருத்துக்கள்
தொடர்ந்தும், ஜனவரி 8 ஆம் திகதி கிழக்கு மாகாணத்தை பிரதிநிதித்துவப்படுத்தும் அம்பாறை மாவட்ட செயலகத்திலும், ஜனவரி 10 ஆம் திகதி மேல் மாகாணத்தை பிரதிநிதித்துவப்படுத்தும் பண்டாரநாயக்க மாநாட்டு மண்டப வளாகத்திலும் பொதுமக்களின் கருத்துக்கள் பெற்றுக்கொள்ளப்படும்.
அதன் பின்னர், மின் கட்டணம் குறித்த இறுதி முடிவு ஜனவரி 17ஆம் திகதி அறிவிக்கப்படும் என்று பொதுப்பயன்பாட்டு ஆணைக்குழு தெரிவித்துள்ளது.
இதேவேளை, மின்சார சபை இலாபம் ஈட்டி வருவதாகவும், எதிர்காலத்தில் மின் கட்டணத்தை திருத்தியமைத்து பொதுமக்களுக்கு 6வீத நிவாரணம் வழங்க முடியும் எனவும் அரச முற்போக்கு ஊழியர் சங்கம் தெரிவிக்கின்றது.
| நாட்டு நடப்புகளை உங்கள் கைபேசியில் பெற்றுக்கொள்ள முதன்மை WHATSAPP குழுவில் இணையுங்கள் JOIN NOW |
