ஆயுதங்களுடன் முன்னாள் இராணுவ வீரர் கைது!
Rakshana MA
எம்பிலிப்பிட்டிய பகுதியில் ஓய்வுபெற்ற இராணுவ சிப்பாய் ஒருவரிடமிருந்து பல வகை துப்பாக்கிகள் கைப்பற்றப்பட்டுள்ளதாக கொத்தலாவல பொலிஸார் தெரிவித்துள்ளனர் .
நேற்று (04) மேற்கொள்ளப்பட்ட சுற்றிவளைப்பின் போதே குறித்த நபர் கைது செய்யப்பட்டுள்ளார்.
இவரிடம் இருந்து ஏ.கே 47 ரக துப்பாக்கி மற்றும் கூரிய ஆயுதங்களும் மீட்கப்பட்டுள்ளதாக பொலிஸார் குறிப்பிட்டுள்ளனர்.
மேலதிக விசாரணை
பொலிஸாருக்கு கிடைத்த இரகசிய தகவலையடுத்து கொத்தலாவல சந்திக்கு அருகில் விசேட அதிரடிப்படையினர் இந்த சுற்றிவளைப்பை மேற்கொண்டுள்ளனர்.
மேலும் கைது செய்யப்பட்ட சிப்பாயிடம் இருந்து கைத்துப்பாக்கி, 7.62 மி.மீ., ரவைகள் 25, 9 மி.மீ., ரவைகள் 7, ஏ.கே.47 ரக மெகசின், இரண்டு வாள்கள் மற்றும் கத்தி ஆகியவை மீட்கப்பட்டுள்ளன.
கைது செய்யப்பட்ட சந்தேக நபர் எம்பிலிப்பிட்டிய பிரதேசத்தில் வசிக்கும் 53 வயதுடையவர் எனவும் தற்போது விளக்கமறியலில் வைக்கப்பட்டுள்ள 'போடி லஸ்ஸி' என்ற பாதாள உலக நபரின் நெருங்கிய சகா எனவும் ஆரம்பகட்ட விசாரணைகளில் தெரியவந்துள்ளது.
இந்நிலையில், கொத்தலாவல பொலிஸார் இது தொடர்பில் மேலதிக விசாரணைகளை முன்னெடுத்து வருகின்றனர்.
| நாட்டு நடப்புகளை உங்கள் கைபேசியில் பெற்றுக்கொள்ள முதன்மை WHATSAPP குழுவில் இணையுங்கள் JOIN NOW |
