திருகோணமலையில் துப்பாக்கிச் சூட்டில் கடற்படை வீரர் பரிதாப பலி

திருகோணமலை - கப்பல்துறை பகுதியில் முச்சக்கர வண்டி மீது நடத்தப்பட்ட துப்பாக்கிச் சூட்டில் உயிரிழந்தவர் கடற்படை வீரர் என காவல்துறையினர் தெரிவித்துள்ளனர்.

இந்தத் துப்பாக்கிச் சூட்டில் முச்சக்கர வண்டியைச் செலுத்திய நபர் சம்பவ இடத்திலேயே உயிரிழந்துள்ளார்.

உயிரிழந்தவர் திருகோணமலைப் பகுதியைச் சேர்ந்த 39 வயதுடையவர் என அடையாளம் காணப்பட்டுள்ளார்.

காவல்துறை ஊடகப் பிரிவு

மேலும், துப்பாக்கிச் சூட்டில் காயமடைந்த ஆனந்தகுளம் பகுதியைச் சேர்ந்த 28 மற்றும் 38 வயதுடைய இருவர் திருகோணமலை வைத்தியசாலையில் அனுமதிக்கப்பட்டுள்ளனர்.

அவர்களில் ஒருவர் மேலதிக சிகிச்சைக்காக அனுராதபுரம் வைத்தியசாலைக்கு மாற்றப்பட்டுள்ளார்.

நேற்று (02) இரவு வீதியோரத்தில் நிறுத்தி வைக்கப்பட்டிருந்த முச்சக்கர வண்டியில் இருந்தவர்களை இலக்குவைத்து இந்தத் துப்பாக்கிச் சூடு நடத்தப்பட்டுள்ளதாகத் தெரிவிக்கப்படுகிறது.

ஆரம்பகட்ட விசாரணைகளின்படி, T-56 ரக துப்பாக்கியைப் பயன்படுத்தி இந்தத் தாக்குதல் நடத்தப்பட்டுள்ளமை தெரியவந்துள்ளது.

மேலும், போதைப்பொருள் கடத்தல் தொடர்பாக ஏற்பட்ட முரண்பாடே துப்பாக்கிச் சூட்டுக்குக் காரணமாக இருக்கலாம் என விசாரணைகளில் தெரியவந்துள்ளது.

சம்பவம் தொடர்பில் திருகோணமலை பிரிவுக்கான குற்றப் புலனாய்வுப் பிரிவு உள்ளிட்ட பல காவல்துறை குழுக்கள் விசாரணைகளை ஆரம்பித்துள்ளதாக காவல்துறை ஊடகப் பிரிவு தெரிவித்துள்ளது.