சமூக ஊடக வாக்குவாதம் கொலையில் முடிந்தது; ஷார்ஜாவில் அடித்துக் கொல்லப்பட்ட இஸ்மாயில்!

UAE - ஷார்ஜாவில் சமூக ஊடகங்களில் ஏற்பட்ட தகராறு உயிரிழப்பாக மாறியுள்ள சம்பவம் அதிர்ச்சியை ஏற்படுத்தியுள்ளது.

டிக்டாக்கில் தொடங்கிய வாக்குவாதம் நேரடி மோதலாக மாறியதில், இந்தியாவைச் சேர்ந்த வெளிநாட்டு தொழிலாளர் ஒருவர் பட்டப்பகலில் கத்தியால் குத்தப்பட்டும், தடியால் தாக்கப்பட்டும் கொல்லப்பட்டதாக தெரிவிக்கப்படுகிறது.

உயிரிழந்தவர் இஸ்மாயில் பொன்னன் இப்ராஹிம் குட்டி (40) என அடையாளம் காணப்பட்டுள்ளார்.

கேரளாவைச் சேர்ந்த அவர், துபாயில் உள்ள ஒரு பேக்கரியில் பணியாற்றி வந்ததுடன், சமூக ஊடகங்களில், குறிப்பாக டிக்டாக்கில், தீவிரமாக செயல்பட்டு வந்ததாக கூறப்படுகிறது.

அவரது பின்தொடர்பவர்களின் தகவலின்படி, இஸ்மாயில் மற்றும் சில டிக்டாக் பயனாளர்களுக்கு இடையே நேரலை நிகழ்ச்சியின் போது கடும் வாக்குவாதம் ஏற்பட்டுள்ளது.

இதையடுத்து, அல் நஹ்தா பகுதியில் உள்ள ஒரு பூங்கா அருகே நேரில் சந்திக்குமாறு அவர் சவால் விடுத்ததாக கூறப்படுகிறது. அதன்பின், சம்பவ இடத்துக்கு வந்த சிலர் இஸ்மாயிலை வழிமறித்து தாக்கியதாகவும், அந்த தாக்குதலிலேயே அவர் உயிரிழந்ததாகவும் தகவல்கள் தெரிவிக்கின்றன. சம்பவம் தொடர்பாக அதிகாரிகள் விசாரணை நடத்தி வருகின்றனர்.