குரோஷியா முதியோர் இல்லத்தில் இடம்பெற்ற துப்பாக்கிச்சூட்டில் ஆறு பேர் பலி

குரோஷியாவில் முதியோர் இல்லம் ஒன்றில் இடம்பெற்ற துப்பாக்கிச்சூட்டில் துப்பாக்கிதாரியின் தாயார்  உட்பட 6 பேர் உயிரிழந்துள்ளதாக சர்வதேச ஊடகங்கள் செய்தி வெளியிட்டுள்ளன.

குறித்த துப்பாக்கிச் சூட்டில் ஐந்து பேர் சம்பவ இடத்திலேயே உயிரிழந்துள்ளதாகவும், மற்றொருவர் வைத்தியசாலையில்  உயிரிழந்துள்ளதாகவும் குறிப்பிடப்பட்டுள்ளது.

அத்தோடு, இந்த  சம்பவத்தில் குறைந்தது ஆறு பேர் காயமடைந்துள்ளதாகவும் அதில் நான்கு பேர் படுகாயமடைந்துள்ளதாகவும் தெரிவிக்கப்படுகின்றது.

6 பேர் பலி

இதன்போது, துப்பாக்கிச்சூட்டில் உயிரிழந்தவர்கள் பெரும்பாலும் 80 மற்றும் 90 வயதுக்குட்பட்டவர்கள் என்று குரோஷியாவின் பிரதமர் தெரிவித்துள்ளார்.

இந்த நிலையில், துப்பாக்கிச்சூட்டை நடத்தியவர் அங்கிருந்து தப்பிச் சென்றதையடுத்து கைது செய்யப்பட்டுள்ளதாக தெரிவிக்கப்படுகின்றது.

துப்பாக்கிச்சூடு

சந்தேக நபர் 1973 இல் பிறந்தவர் என்றும் 1991-95 குரோசியாவில் நடந்த போரில் பங்கேற்ற படை உறுப்பினர் என்று குரோஷியா பொலிஸார் தெரிவித்துள்ளனர்.

மேலும்,  இந்த துப்பாக்கி சூட்டு சம்பவத்துக்கான காரணம் குறித்து இன்னும் தகவல்கள் வெளியாகவில்லை என குறிப்பிடப்பட்டுள்ளது.