யாழில் வாள்வெட்டு தாக்குதல்: குடும்பஸ்தர் பலி

யாழில், இளம் குடும்பஸ்தர் ஒருவரை கும்பல் ஒன்று கடத்திச் சென்று வாள்வெட்டு தாக்குதல் மேற்கொண்ட நிலையில் அவர் உயிரிழந்துள்ளார்.

வட்டுக்கோட்டை - மாவடி பகுதியைச் சேர்ந்த 23 வயதுடைய குடும்பஸ்தர் ஒருவரே நேற்றையதினம் (11.03.2024) இவ்வாறு உயிரிழந்துள்ளார்.  

இச்சம்பவம் குறித்து மேலும் தெரியவருகையில்,

குறித்த குடும்பஸ்தரும் அவரது மனைவியும் காரைநகரில் இருந்து வட்டுக்கோட்டை - மாவடியில் உள்ள வீட்டுக்கு சென்றுகொண்டிருந்தவேளை, பொன்னாலை கடற்படை முகாமுக்கு அருகாமையில் இரண்டு கார்களில் ஆயுதங்களுடன் நின்ற சிலர் அவர்களை வழி மறித்துள்ளனர்.

பொலிஸ் நிலையத்தில் முறைப்பாடு

இதன்போது, இருவரும் தப்பித்து கடற்படை முகாமுக்குள் நுழைந்துள்ளதையடுத்து, கடற்படையினர் அவர்களை வெளியே விரட்டியுள்ளனர்.

இந்நிலையில், அவர்கள் வெளியே வந்தவுடன், ஒரு காரில் மனைவியையும், அடுத்த காரில் குடும்பஸ்தரையும் ஏற்றிக்கொண்டு குறித்த குழு அங்கிருந்து சென்றுள்ளது.

அதன்பின்னர், மனைவியை சித்தங்கேணி சந்தியில் இறக்கி விட்டதையடுத்து மனைவி வட்டுக்கோட்டை பொலிஸ் நிலையத்தில் முறைப்பாடு பதிவு செய்வதற்கு சென்றுள்ளார்.

மேலதிக விசாரணை

இந்நிலையில், குறித்த நபரை கடத்திச் சென்றவர்கள் அவர் மீது வாள்வெட்டு தாக்குதல் மேற்கொண்ட பின்னர் வட்டுக்கோட்டை பிரதேச வைத்தியசாலையினுள் காரில் சென்று, வைத்தியசாலையில் உள்ள மாமரத்துக்கு கீழே அவரை தூக்கி வீசிவிட்டு சென்றுள்ளனர்.

இந்நிலையில், வைத்தியசாலையில் இருந்த சுகாதார பணியாளர்கள் இது குறித்து யாழ்ப்பாணம் போதனா வைத்தியசாலை வைத்தியர் ஒருவருக்கு தொலைபேசி மூலம் தெரியப்படுத்தியுள்ளனர்.

அந்த இடத்திற்கு வந்த வைத்தியர் நோயாளர் காவு வண்டி மூலம் அவரை யாழ்ப்பாணம் போதனா வைத்தியசாலைக்கு கொண்டு சென்றவேளை, சில நிமிடங்களில் அவர் வைத்தியசாலையில் உயிரிழந்துள்ளார்.

இதனையடுத்து, கடற்படை முகாமுக்கு இன்றையதினம் சென்ற தடயவியல் பொலிஸார் விசாரணைகளை மேற்கொண்டு வருகின்றனர்.